АҞӘА, рашәара 29 - Sputnik. Урыстәыла Адәныҟатәи аусқәа рминистр Сергеи Лавров аҳәамҭа ҟаиҵеит украинатәи аҭагылазаашьа иадҳәалоу аӡбарақәа ЕАА аҳәынҭдепартамент аҿоуп иахьырыӡбо, абри атәы аанацҳаит РИА Новости, Каспиа иаԥну атәылақәа рыдәныҟатәи аусқәа рхадацәа реилатәара аихшьалатә пресс-конференциаҿ, Урыстәыла ААР ахада иажәақәа шьаҭас иҟаҵаны.
"Сара салацәажәом Владимир Зеленски дзықәгәыӷуа. Сара сзы зегь акоуп уи дзызхәыцуа, дзықәгәыӷуа. Аӡбарақәа рыдыркылоит Вашингтон. Ахадацәа рыҩаӡарала акәымкәа, аҳәынҭдепартамент ачынуаа рыҩаӡарала", - иҳәеит Лавров.
Уи адагьы иара мраҭашәаратәи аполитикцәа Украинеи Урыстәылеи рыбжьара уажәазы еиҿцәажәара ҟамлароуп ҳәа ирҳәо шизофрениоуп ҳәа ахиҳәааит.
Убри аан Лавров иазгәеиҭеит Британиа аԥыза-министр Борис Џьонсони, германиатәи аканцлер Олаф Шольци, евродипломатиа ахада Жозеп Боррели Украинаҟа абџьар нашьҭлатәуп ҳәа шеицырҳәо. Сергеи Лавров иҳәеит Урыстәыла алкаақәа шыҟанаҵо Урыстәыла аинтересқәа зқьышә иқәызҵо мраҭашәаратәи апартниорцәа рганахьала.