АҞӘА, рашәара 30 – Sputnik, Бадраҟ Аҩӡба. Аминистрцәа реилазаара иаднакылеит Аԥсны Агәабзиарахьчара аминистрреи Урыстәыла ауаҩы ибзазареи ахархәаҩцәа рзинқәа рыхьчареи русхк ахылаԥшразы Афедералтә маҵзуреи рыбжьара асанитар-епидемиологиатә ҭагылазаашьа аиқәыршәаразы аиқәшаҳаҭра апроект.
Аминистр Едуард Быҭәба иажәақәа рыла, адокумент анапаҵаҩра азгәаҭоуп Аԥсни Урыстәылеи рыбжьара асоциал-економикатә зеиԥшҵакыра азыԥхьагәазҭо апрограмма аиҿкаарала. Аиқәшаҳаҭра атәылақәа русбарҭақәа реинырреи русеицуреи иазырхоуп.
"Аиқәшаҳаҭра азы аилацәажәара мҩаԥган Аԥсны адәныҟатәи аусқәа рминистрра, аекономика аминистрра, аиустициа аминистрра, афинансқәа рминистрраҟны. Иара убас, аиқәшаҳаҭра рыдыркылеит Урыстәыла ауаҩы ибзазареи ахархәаҩцәа рзинқәа рыхьчареи русхк аҟны ахылаԥшразы Афедералтә маҵзураҟны", - иҳәеит Быҭәба.
Апроект иазыԥхьагәанаҭоит аҿкчымазарақәа ралаҵәараан аинырра, ауааԥсыра ргәабзиара аиҿкаара, аинформациа аимадара арманшәалара, иара убасгьы асанитар-гигиенатә информациа аимдареи асанитар-карантинтә хылаԥшар арҭбаареи.