АҞӘА, ԥхынгәы 1 – Sputnik, Бадраҟ Аҩӡба. Аԥсны ахада Аслан Бжьаниеи Урыстәыла ахада иҿы иҟоу Аҳәаанырцә тәылақәа арегионбжьаратәи акультуратәи хырхарҭақәа рҿы рыҽрымадаразы Аусбарҭа аиҳабы Игор Маслови Агәыбедиа ақыҭаҿ иаҭааны ирбеит X ашәышықәсазы иргылаз Бедиатәи ауахәама.
Ауахәама аиқәырхаразы еиҿкаау афонд аиҳабы асасцәа ирзеиҭалҳәеит аргыларахь уназго амҩа шеиҭашьақәыргылоуп, уи акәша-мыкәша аҵлақәа шеиҭаҳау, аҵеџь шыҟаҵоу. Уи адагьы Аԥсны Аџьынџьтәылатә еибашьраан ақырҭуа ар ааха зырҭаз ауахәама аҩадатәи аҭӡы еиҭашьақәыргылоуп лҳәеит Арышԥҳа.
Игор Маслов даара зҿлымҳарыла ауахәама аҭоурых дазҵаауан, уи аҭагылазаашьа ҭиҵаауан. Иахьатәи аамҭазы Бедиатәи ауахәама еиҭашьақәыргылатәуп, уи азы апроект-харџьтә шәҟәқәа зегь еиқәыршәоуп, хара имгакәа аекспертиза аҟаҵара иалагар ҟалоит.
"Ҳара аҳәынҭқарратә експертиза ҳалагар ҳалшоит. Иҟаҵоу рацәоуп, 20 миллион мааҭ ақәхарџьуп уажәазы. Ареставрациахь ҳмиасыр, ауахәама ҳзеиқәырхаӡом, шәхаҭагьы ижәбоит уи аҭагылазаашьа зеиԥшроу", - лҳәеит Арышԥҳа.
Тҟәарчал араион Агәыбедиа ақыҭан иҟоу ауахәаматә комплекс ргылан X-XIV ашәышықәсақәа рзы. Иара иҩаҳаракыран ишьҭоу аҟьаҟьара иқәгылоуп, акәша-мыкәша ишьҭоу акаршәрақәа зегьы убарҭоуп.
Уаанӡа Аԥсны ахада Аслан Бжьаниеи Аҳәаанырцә тәылақәа арегионбжьаратәи акультуратәи хырхарҭақәа рҿы рыҽрымадаразы Аусбарҭа аиҳабы Игор Маслови Владислав Арӡынба ихьӡ зху Аҟәатәи аҳаиртә баӷәаза иаҭааит.
Аекономика аминистр Кристина Озган иазгәалҭеит уажәтәи аамҭазы аԥыррақәа рыԥҟарақәеи реиҿкаареи ирызку аанорматив-зинтә шьаҭа ашьақәыргылара ишаҿу.