АҞӘА, ԥхынгәы 1 – Sputnik, Бадраҟ Аҩӡба. Аԥсны ахада Аслан Бжьаниеи Урыстәыла ахада иҿы иҟоу Аҳәаанырцә тәылақәа арегионбжьаратәи акультуратәи хырхарҭақәа рҿы рыҽрымадаразы Аусбарҭа аиҳабы Игор Маслови иаҭааны ирбеит Нанҳәа иазку Мықә ауахәама.
Игорь Маслов ҳамҭас ирҭеит Анаҟәаԥиа арабцәа рыр ириааиз аԥсҳа Леон I, Аԥсуа аҳра ашьаҭа зкыз Леон II, иара убас Мықәтәи ауахәама зыргылаз Леон III зну асахьақәа.
"Шәыԥсадгьыл Аԥсны иахьа шәшаҵеицәа иашақәоу, гәаартыла шәшыҟоу, шәгәы абзиа шҭаку, Анцәа игәра шыжәго - убас шәыҟаз еснагь, убасҟан ауп зегь аншәықәҿио, - иҳәеит Маслов, адкыларази ирҭаз аҳамҭақәа рзи иҭабуп ҳәа раҳәо.
Уаанӡа Аԥсны ахада Аслан Бжьаниеи Аҳәаанырцә тәылақәа арегионбжьаратәи акультуратәи хырхарҭақәа рҿы рыҽрымадаразы Аусбарҭа аиҳабы Игор Маслови Владислав Арӡынба ихьӡ зху Аҟәатәи аҳаиртә баӷәаза иаҭааит, Бедиатәи ауахәама, Очамчыратәи амшын баӷәаза.