АҞӘА, ԥхынгәы 2 – Sputnik. Сергеи Багаԥшь ихьӡ зху амҵәышәымпыл азы ахацәа рыбжьара XI жәларбжьаратәи атурнир аатит ԥхынгәы 2 рзы Аҟәа, абри атәы аанацҳауеит Аԥсны аҿари аспорти русқәа рзы Аҳәынҭеилакы.
Ахраҿа хадазы еиндаҭлоит аа-командак. Аԥснытәи амҵәышәымпыл асҩцәа рыда атурнир иалахуп ДЖәР-нтәи аспортсменцәа, урыстәылатәи акомандақәа фба- Волгоградтәи аобласт, Краснодартәи атәылаҿацә, Ҟарачы, Санкт-Петербург рҟынтәи аспортсменцәа, иара убас Ростовтәи аобласт аҟынтәи даҽа ҩ-командак.
Зынӡа иазгәаҭоуп ԥшь-хәмаррак. Раԥхьа еиндаҭлоит Аԥсни Волгогради ркомандақәа, аҩбатәи- Ҟәбинеи Санкт-Петербурги. Ахԥатәи ахәмарра мҩаԥыргоит Волгодонсктәи Черқьески амҵәышәымпыл асҩцәа, аԥшьбатәи ахәмарраҟны еиқәшәоит ақалақь Шахты аспортсменцәеи ДЖәР-и.
Ахәмаррақәа маԥыслоит есыҽны.
Аԥсны аҩбатәи ахада Сергеи Багаԥшь игәалашәара иазку амҵәышәымпыл азы жәларбжьаратәи атурнир мҩаԥыргоит 2011 шықәса раахыс.