АҞӘА, ԥхынгәы 3 – Sputnik, Бадраҟ Аҩӡба. Ашәаҳәара-инструменталтә ансамбль "Гәында" аныҳәатә концерт мҩаԥнагеит Амҳаџьырқәа рыԥшаҳәаҿы Аҟәа 2506 шықәса ахыҵра аҳаҭыр азы.
Аколлектив алахәылацәа ашәақәа нарыгӡеит аевкалипт ду амҵан. Дара рыбжьы заҳауаз аҭыԥантәи ауааԥсыреи аԥсшьаҩцәеи рыдеизалеит. Ашәак рҳәацыԥхьаӡа ахәаԥшцәа рнапы еинырҟьон, рашәаҳәашьа ргәарԥханы ажәа ԥхақәа рарҳәон.
"Сара даара исгәаԥхоит аколлектив рықәгылара, зегьы рыбжьқәа хаауп, иԥшӡоуп. Сҩызеи сареи аԥшаҳәаҿы ҳшынеиааиуаз ашәаҳәабжь анҳаҳа, ҳаангыланы ҳазыӡырҩырц ҳаӡбеит, даара иџьаҳшьеит, ҳгәы иахәеит ҳазыԥшӡамкәа абри аҩыза аконцерт ҳахьақәшәаз", - лҳәеит ԥсшьара Аҟәаҟа иааз Наталиа.
Ԥхынгәы 3 рзы Аҟәа 2506 шықәса ахыҵра амш азгәарҭоит. Ари аныҳәа есышықәса ԥхынгәымза раԥхьатәи асабшазы иазгәарҭон, аха сынтәа уи Тамшьтәи адесант аныӡхыҵыз амш иахьақәшәаз азы амҽышахь ииагазарц ӡбан.
Аҟәа - ижәытәӡоу адунеи ақалақьқәа иреиуоуп. Раԥхьаӡа акәны ара ауаа реиланхарҭа шьақәгылеит ҳәа иазгәарҭоит ҳера ҟалаанӡа VI ашәышықәсазы, уи аахижьҭеи ҩ-нызқьи бжакы шықәса иҵхьоу ирылагӡаны аҭыԥантәи ашьхарыуа жәларқәа аԥсилқәеи абазгқәеи ркультурақәа еилаҵәон, урҭ ирылаҵәон еиуеиԥшым егьырҭ акультурақәагьы - абырзенцәа, генуиаа, аурымқәа, византиаа, аҭырқәцәа, аџьамцәа, аурысцәа уҳәа аӡәырҩы.