АҞӘА, ԥхынгәы 7 - Sputnik. Аԥснытәи АССР зҽаԥсазтәыз азиндырыҩ, аиустициа абжьгаҩ еиҳабы, аорден "Ахьӡ-Аԥша" III аҩаӡара занашьоу Сергеи Бганба 90-шықәса дшырҭагылаз иԥсҭазаара далҵит.
Сергеи Бганба диит цәыббра 18, 1933 шықәсазы Бзыԥ ақыҭан. Далгеит Саратовтәи азиндырратә институт. 40 шықәса инареиҳаны прокурорс дыҟан. Аԥсны апрокурор хада актәи ихаҭыԥуаҩыси ицхырааҩыси дыҟан (1993–1998 шш.).
1998 шықәса раахыс ААУ азиндырратә факультет акафедраҿ рҵаҩыс аус иуан. 2010 шықәсазы акафедра адоцентс дҟалеит. Аорден "Ахьӡ-Аԥша" III аҩаӡара ианашьоуп. 2015 шықәсазы иҭыҵыз агәалашәаратә шәҟәы "Сгәалашәараҿы иҟоу рзы" давторуп.
Сергеи Бганба анышә дамардоит ԥхынгәы 8 рзы Алада Ешыра.