АҞӘА, ԥхынгәы 15 - Sputnik. Аԥыза-министр ихаҭыԥуаҩ, аекономика аминистр Кристина Озган Москва усутә ныҟәарыла лыҟазаараан Урыстәылатәи Аихамҩақәа рдиректор хада Олег Белозиоров диԥылеит ҳәа аанацҳауеит аекономика аминистрра апресс-маҵзура.
Аганқәа аусеицуреи аҳәынҭқаррақәа рыбжьара апассаџьырцәеи аидарақәеи рымҩангара аиҿкаара иалацәажәеит. Кристина Озган илҳәеит аладатәи ахырхарҭаҿы аилахарақәа ирхырҟьаны ареспубликахь аҵакы змоу аидарақәа рнеира анеиҵахо шыҟоу.
УА адиректор хада иҳәеит ганрацәала Аԥсны азы хра злоу аидарақәа ианаамҭоу рынашьҭра ацхыраара дшазыхиоу.