АҞӘА, ԥхынгәы 16 – Sputnik, Бадри Есиава. Нестор Џьанбеи Хорен Акопиани ақәыԥшцәа рыбжьара урыстәылазегьтәи абокс азы акласс "А" атурнир афинал ахь инеит, дара аспорт азҟаза ахьӡ аиуразы еиндаҭлоит, абри атәы иҳәеит аспортсменцәа разыҟаҵаҩцәа руаӡәк Давид Аҩӡба.
"Афинал аҟны иаиааир аспорт азҟаза ҳәа ахьӡ рыхҵахоит. Нестор- сааӡымҭа иоуп, Хорен дазыҟаиҵоит Едуард Депелиан. Абокс иалоуижьҭеи кыр ҵуеит, алҵшәа бзиақәа аадырԥшуеит. Дара Аԥсны иачемпионцәоуп, жәларбжьаратәи аицлабрақәа ириааихьеит", - иҳәеит Аҩӡба.
© Foto / Комитет молодежи с спорта РА
Аҩӡба иажәақәа рыла, аспортсменцәа азыҟаҵара бзиа рымоуп, аспорт азҟаза ахьӡ агара рылшоит. Нестор Джанба ари атурнир аҟны имҩаԥигаз ахәмаррақәа хԥа рҟны даиааит, Гәылрыԥшьтәи Хорен Акопиан ԥшьынтә аринг ахь дцәырҵит, аиааирагьы игеит.
СССР аԥырҩы- акосмонавт Витали Севастианов игәалашәаразы имҩаԥысуа атурнир хацыркын ԥхынгәы 12 рзы, ихыркәшахоит ԥхынгәы 16 рзы. Азыҟаҵаҩ иажәақәа рыла, рҽазҵәылхны аҽазыҟаҵарақәа ирҿуп.
Витали Севастианов игәалашәаразы имҩаԥысуа атурнир иалахәуп Урыстәыла 33 регион рҟынтәи шәҩык инреиҳаны аспорстменцәа.
Витали Севастианов- аԥырҩы- акосмонавт, аполковник ԥхьатәа, Асовет Еидгыла ҩынтә Афырхаҵа, атехникатә ҭҵаарадыррақәа акандидат, зҽаԥсазтәыз аспорт азҟаза.
Лаҵара 31 2019 шықәсазы Урыстәыла ахада иусԥҟала Шәачатәи жәларбжьаратәи аҳаирбаӷәаза ихьӡ ахҵан.