АҞӘА, ԥхынгәы 22 – Sputnik. Урыстәыла аладатәии агәҭантәии ахәҭақәа рҳаирбаӷәазақәа рҟны иалагалоу аамҭалатәи аԥкрақәа ирыцҵоуп ԥхынгәы 30 рҟынӡа ҳәа аанацҳауеит Росавиациа.
Зусура ԥку аҳаирбаӷәазақәа ирыҵанакуеит Анапа, Белгород, Брианск, Воронеж, Геленџьықь, Краснодар, Курск, Липецк, Ростов-на-Дону, Симферополь, Елиста.
Авиаеилахәырақәа ирабжьагоуп Шәача, Аминерал ӡқәа, Волгоград, Ставрополь, Москва рҟны аҳаирбаӷәазақәа ахархәара рыҭалазарц.
Егьырҭ аҳаирбаӷәазақәа штаттә режимла аус руеит.
Урыстәыла аладатәии агәҭантәии ахәҭақәа рҳаирбаӷәазақәа рҟны аамҭалатәи аԥкрақәа алагалоуп жәабран 24 раахыс уа аҳаирбаӷәазақәа шәарҭоуп ҳәа ишьаны.