АҞӘА, ԥхынгәы 26 – Sputnik. 1-7 аклассқәа рзы урыстәылатәи арҵагашәҟәқәа рыла 90 процент ашколқәа еиқәыршәоуп, абри атәы арадио Sputnik иазеиҭеиҳәеит Аԥсны аҵареи абызшәатә политикеи рминистр Инал Габлиа.
Аҵара министр агәыӷра аарԥшит, цәыббрамзанӡа аиҳабыратә классқәагьы арҵагашәҟәқәа рыла еиқәыршәахап ҳәа. Аԥсны иҭрыжьуа ашәҟәқәа рзы уадаҩра ыҟам иҳәеит Габлиа.
Аминистр иажәақәа рыла, ҩышықәса ҵуеит аҟазауаа Аԥсны аҭоурых аиҭагара иаҿуижьҭеи. Хара имгакәа акьыԥхь ахь ирыҭахоит. Габлиа иҳәеит ҽааны ашәҟәы ахархәара аиур шауа.
Уи адагьы, Габлиа иазгәеиҭеит, Аԥсны агеографиа ашәҟәы аԥсшәахь аиҭагара ишаҿу, аиҭага актәи аверсиа шыхиоу.
Ԥхынҷкәынмзазы Аԥсны аҵареи абызшәатә политикеи рминистр Инал Габлиа аусутә зҵаарақәа рзы Москва даныҟаз ашьҭахь, арадио Sputnik аинтервиу аҭо иҳәеит, Урыстәыла анапхгара рыцхыраарала Аԥсныҟа амҩа ишықәҵоу 1-7 аклассқәа рзы арҵагашәҟәқәа.