АҞӘА, ԥхынгәы 26 – Sputnik, Бадри Есиава. Аԥснытәи аспортсменцәа хьтәы медалки аџьазтәқәа ҩбеи ргеит афестиваль "Абаза" аҿы ҳәа Sputnik иазеиҭеиҳәеит аԥсуа команда акапитан, "Адунеизегьтәи аԥсуа-абаза конгресс" аҭыԥантәи аҟәшақәа ркоординатор Валери Берзениа.
"Сынтәа афестиваль иалахәын аулқәа жәба, иара убасгьы ҳаспортсменцәа 26-ҩык. Ауснагӡатә акыр иҭбаан. Ашьыжь асааҭ 10 инаркны ҵхагәанынӡа имҩаԥысуан. Аԥснытәи аспортсменцәа аӡӷабцәа рыбжьара анапылампыл аҿы актәи аҭыԥ ргеит, иара убасгьы аӡӷабцәа рыбжьара ахыци ахәымпали рыла ахысраҿы ахԥатәи аҭыԥ ргеит, аҷкәынцәа рыбжьара шәметрак аҩраз ахԥатәи аҭыԥ ргеит", - иҳәеит иара.
Аспортсменцәа ашьапылампыл, ахыци ахәымпали рыла ахысра, анапылампыл, аҩра, урыла аԥара, атлетика хьанҭа, армрестлинг рҟны рхы ԥыршәон. Берзениа ишиҳәаз ала, афестиваль "Абаза" раԥхьаӡа акәны аашықәса раԥхьа имҩаԥган. Аҵыхәтәантәи ҩышықәса пандемиа иахырҟьан имҩаԥыргомызт.
Аусмҩаԥгатә еиҿкаан Ҟарачы-Черқьесиа, Абаза жәлар ркультура амш аҽны ԥхынгәы 23 рзы, Аԥсны Аҳәынҭқарратә бираҟ Амш аназгәарҭоз. Аицлабраҿ иаиааиуа роуп иара мҩаԥгахараны иахьыҟоу шьақәзыргыло. Сынтәа аул Ҟәбина имҩаԥган.
Аԥснытәи аспортсменцәа афестиваль "Абаза" рҽаладырхәит
© Foto / Валерий Берзения
Аиҿкааҩцәа: абаза-аԥсуа етнос аҿиара ацхраараз Ассоциациа "Алашара", Адунеизегьтәи аԥсуа-абаза конгресс.
"Афестиваль зықьҩык инареиҳаны иалахәын. Аҭагылазаашьа лахҿыхын. Зегь агәахәара рҿықәын. Ахәыҷқәа, адуцәа, абыргцәа рацәан. Даара гәахәарыла ҳрыдыркылеит. Аспортсменцәа акыр иазыҟаҵан", - ҳәа еиҭеиҳәеит Берзениа.
Ԥхынгәы 25 рзы афестиваль асасцәа рзы ақыҭа Архызҟа аекскурсиа мҩаԥган.