АҞӘА,ԥхынгәы 27 – Sputnik. Ашәҟәыҩҩцәа Шьалодиа Аџьынџьали Гьаргь Гәыблиеи, аспорти абаҩрҵәыреи русхк аҟны зҽаԥсазтәыз аусзуҩ Роберт Дилениани, Аџьынџьтәылатә еибашьраан иҭахаз Беслан Касланӡиеи ргәалашәара наӡаӡартәраны иҟоуп. Абри азы еицҿакрыла аӡбара рыдыркылеит Аҟәатәи ақалақьтә еизара адепутатцәа, Ауаажәларратә комиссиа алкаақәа рышьаҭала.
Амемориалтә ӷәқәа кыдырҵоит арҭ ауаа ахьынхоз аҩнқәа рҭыӡқәа рҿы.
Ашәҟәыҩҩцәа Шьалодиа Аџьынџьали Гьаргь Гәыблиеи, аспорти абаҩрҵәыреи русхк аҟны зҽаԥсазтәыз аусзуҩ Роберт Дилениани, Аџьынџьтәылатә еибашьраан иҭахаз Беслан Касланӡиеи ргәалашәара анаӡаӡартәразы ашәҟәқәа Аҟәатәи ақалақьтә еизарахь инаишьҭит аҳҭнықалақь ахада Беслан Ешба.
Амҩақәа, амҩадуқәа, абжьаларҭақәа, апаркқәа, аскверқәа, абульварқәа, ашҭақәа рыхьӡқәа рышьақәыргылареи рыԥсахреи рзы Ауаажәларратә комиссиа ажәалагала иахәаԥшит.