АҞӘА, ԥхынгәы 27 - Sputnik, Асмаҭ Ҵәыџьԥҳа. Аԥсны Жәлар Реизара аҵыхәтәантәи аԥхьарала азакәан "Акурорттә еизгараз" амчра ыӡит ҳәа азханаҵеит, азакәан "Аԥсны ашәахтә система ашьаҭақәа рзы" аԥсахрақәа аларгалеит.
Акурорттә еизгеи аҳәынҭқарра ахарџьи еибакапануам. Ашәахтә усбарҭақәа ирықәыӷәӷәо ахьанҭара адагьы, аизга атәыла акурорттә хыԥша ланырҟәоит ҳәа азгәаҭоуп аилыркаагатә шәҟәы аҿы.
Акурорттә еизгара аҟынтәи аҳәынҭбиуџьет алагалақәа:
2020 шықәсазы акурорттә еизга 1,1 миллион мааҭ ҟанаҵеит;
2021 шықәсазы акурорттә еизга 5,6 миллион мааҭ ҟанаҵеит;
2022 шықәса актәи азыбжазы еизган 88 000 мааҭ.
Акурорттә еизга аԥыхра абиуџьет ахашәалатә хәҭа рацәак ианыԥшуам ҳәа иршьеит азакәан апроект адызгалаз.
Аҵыхәтәантәи аԥхьарала ирыдкылахаз азакәан амчра аиуеит 2023 шықәса ажьырныҳәа 1 инаркны.