АҞӘА, ԥхынгәы 29 – Sputnik. Аԥсны акультура аминистр Даур Ақаҩбеи Никарагуа акультура аминистр Луис Моралес Альфонсои ҩ-ганктәи аизыҟазаашьақәа рыҿиара иалацәажәеит. Абри атәы аанацҳауеит акультура аминистрра апресс-маҵзура.
Аминистрцәа иазгәарҭеит, ас еиԥш иҟоу аицәажәарақәа акультуартә еимадарақәа реизырҳараҿ ишыцхыраагӡоу.
Никарагуа анапхгареи ажәлари Аԥсны ахьыԥшымра ахьызхарҵаз иҭабуп ҳәа реиҳәеит аминистр.
"Аԥсуа жәлар Никарагуа Ареспублика ҳтәыла жәларбжьаратәи азхаҵараҿы рлагала пату ду рзақәуп. Ҳтәылақәа реиҩызареи, реизыҟазаашьақәеи ԥхьаҟагьы иҿиалоит", - иҳәеит аминистр.
Луис Моралес Альфонсо иганахьала иазгәеиҭеит, Аԥсни Никарагуеи реимадарақәа рышьақәырӷәӷәареи, акультуратә уснагӡатәқәа рынагӡаразы аусеицуреи ишазхиоу.