АҞӘА, нанҳәа 3 – Sputnik. Аԥсны атуризм аминистр Ҭеимураз Хышба арадио Sputnik иазеиҭеиҳәеит Аҟәа аинвестициатә форум ҭагалан амҩаԥгара азгәаҭоуп.
Хышба иазгәеиҭеит, Аԥсны атуризм аминистрреи Атуризм азы Афедералтә маҵзураҿы иаԥҵоу Ауаажәларратә хеилаки ари аԥшьгамҭа шеиҿыркаауа.
"Нанҳәа анҵәамҭаз еилкаахоит зегьы. Аԥсны атуристтә усхк аҿиаразы афорум хәарҭара алоуп. Иҟалап аекономика аминистрреи ҳареи ҳҽеимаҳдар. Урҭ афорумқәа рымҩаԥгараз аԥышәа рымоуп. Ҳара апроектқәа ҳҭахуп, уи азы дарбанызаалак Аԥсны атәылауаҩ илшоит апроект ҳадгалара. Ари атәыла иамоу алшарақәа рзы баша цәажәарам, зеиҭашьақәыргылара зылшо акакәны иаарԥшхоит", - иҳәеит иара.
Хышба иҳәеит Атуризм азы Афедералтә маҵзураҿы иаԥҵоу Ауаажәларратә хеилак ахантәаҩы Дмитри Давыденкои иареи реиԥылараан ишалацәажәаз Аԥсны атуристтә усхк аԥара алагалара иазыхио ауаа рыӡбахә.
"Ҳазлацәажәоз Урыстәыла абизнесуаа ирылшоны иҟоу бжьаратә инвестициақәоуп: 70 -100 миллион мааҭ рҟынӡа", - иҳәеит аминистр.
Аиԥылараҟны урыстәылатәи атуристцәа Аԥсны ршәарҭадара азҵаара иалацәажәон иҳәеит аминистр.