АҞӘА, нанҳәа 4 - Sputnik, Сариа Кәарцхьиаԥҳа. Аԥсны ахәҭак лашарада иаанхеит аҳауатә цәаҳәа "Аҽгәара" аусура ашьықәҟьара иахҟьаны, абри атәы Sputnik иазеиҭеиҳәеит "Амшынеиқәафымцамч" апресс-маӡаныҟәгаҩ Алхас Гагәылиа.
"Аҳауатә цәаҳәа "Аҽгәара" аусура еиԥҟьеит. Иҟоу агәаанагарала ацәаҳәақәа еидкьыслеит. Иара убасгьы ицәеит ЕгрыГЕС агенераторқәа руак", - иҳәеит Гагәылиа.
Иара иажәақәа рыла "Амшынеиқәафымцамч" аремонттә бригадақәа аусурақәа ирылагеит, сааҭк аҩнуҵҟала алашара еиҭоужьхоит.
Лашарада иаанхеит Гагреи Гәдоуҭеи араионқәа, Аҟәа. Мрагыларатәи Аԥсны ахәҭа алашара аиуеит ацәаҳәа "Шьешьелеҭ-1" аҟынтәи.