Путини Ердогани Шәача имҩаԥыргаз реиҿцәажәарақәа рылҵшәақәа рыла аҳәамҭа еицыҟарҵеит

Урыстәылеи Ҭырқәтәылеи рхадацәа реиԥылара ԥшь-сааҭк инацны имҩаԥысуан.
Sputnik
АҞӘА, нанҳәа 5 - Sputnik. Урыстәылеи Ҭырқәтәылеи рхадацәа Владимир Путини Реџьеп Таип Ердогани Шәача имҩаԥыргаз реиҿцәажәарақәа рылҵшәақәа рыла аҳәамҭа еицыҟарҵеит. Адокумент кьыԥхьуп Кремль аофициалтә саит аҟны.
"Иҟоу аҭагылазаашьа уадаҩ иахьмырԥшкәа аҩ-тәылак рхадацәа аурыс-аҭырқәа еизыҟазаашьақәа рырҿиара шырҭаху рҳәеит, урҭ шьаҭас ирымазаауеит ирыбжьоу аҳаҭыри ринтересқәа рыхьчареи", - арбоуп аҳәамҭаҟны.
Аиҿцәажәараҟны атәылақәа рхадацәа аекономикатәи аполитикатәи зҵаарақәа жәпакы ирзааҭгылеит. Иаҳҳәозар, ахадацәа азыразхеит ирыбжьоу аилахәаахәҭра аизырҳара, аенергетика аусхк аҟны аусеицура, иара убас атранспорт, ахәаахәҭра, ақыҭанхамҩа, афинансқәа, атуризм, аргылара ахырхарҭақәа рыла аусецуразы иҟаҵатәу ашьаҿақәа рҳәеит.
Ахадацәа жәларбжьаратәи апроблемақәеи, урҭ рҭышәныртәалараҿы атәылақәа ирылшои ирзааҭгылеит. Хықәкыла иазгәарҭеит украинатәи арыц абаӷәазақәа рҭыгаразы рнапы зҵарҩыз аиқәшаҳаҭреи, уи анагӡареи ишалдыршо ԥықәсларада Урыстәылатәи арыци арҵәыгақәеи рыҭира.
Уи адагьы, Путини Ердогани арегионтә проблемақәа ирылацәажәеит, ҷыдала ирҳәеит Шьамтәылеи Ливии рҵакыреи рхьыԥшымреи реиқәырхара шхымԥадатәиу. Ҭырқәтәылеи Урыстәылеи атерроризм аҿагылараҿы ишаӡәыку азгәарҭеит.
Путини Ердогани аиҿцәажәарақәа мҩаԥыргеит Тегеран