АҞӘА, нанҳәа 6 – Sputnik. Аԥсны аихамҩа аусзуҩцәа аҳаҭыртә ҳамҭақәа ранаршьеит, абри атәы аанацҳауеит Ареспубликатә унитартә наплакы "Аԥснеихамҩа" Telegram адаҟьа.
"Аԥснеихамҩа" аиҳабы Арсоу Ҷыҭанаа аусузҩцәа "Аԥсны аихамҩаҿы аусуразы" амедалқәеи, агәшԥтәы дырга "Ҳаҭыр зқәу аихамҩаусуҩи", иара убас "АУН "Аԥсныеихамҩа" аҿиаразы рлагалеи лҵшәа бзиалатәи русуреи рзы" аҳаҭыртә шәҟәқәа ранеишьеит.
"Аихамҩаҿы аусура агәабзиареи, ачҳареи, адырреи, аҭакԥхықәреи аҭахуп. Иуадаҩу шәусуразы иҭабуп. Аизҳарақәеи, аманшәалареи шәзеиӷьасшьот", - иҳәеит Ҷыҭанаа.
Аихамҩаусуҩ Имш азгәарҭоит нанҳәамза раԥхьатәи амҽыша. Амшныҳәа Аԥсни Урыстәылеи мацара акәым, иара убас Белоруссиа, Казахсҭан, Узбекисҭан, Киргьизиа, Молдавиа, Болгариа иазгәарҭоит.