АҞӘА, нанҳәа 11 - Sputnik. Ганрацәалатәи автомашьынатә аушьҭырҭатә ҭыԥ ақәыӷәӷәара сынтәа 10% рыла еиҳауп ҵыԥх аасҭа, абри атәы аанацҳауеит Краснодартәи аҳазалхырҭа Шәачатәи ақалақьтә маҵзура.
Аԥсшьарамшқәа раан уи еиҳагьы еиҳахоит. Наҟ-ааҟгьы иахысуа автомашьынақәа рхыԥхьаӡара 11 000 ыҟоуп, ауаа – 64 000-ҩык. Убри аан аҳәаа алшарақәа 1500 транспорттә хархәагеи 28 000-ҩык ауааԥсыреи роуп.
Иаҳхысыз аԥсшьарамшқәа раан аҳазалхратә гәаҭара иахысит 21 000 автомашьына, 125 000-ҩык ауааԥсыра.
Аушьҭратә лшара иахьынӡалшо азырҳаразы атранспорттә мҩаҿы ареверстә ныҟәара еиҿыркаауеит, аусзуҩцәа рхыԥхьаӡара иацырҵоит.
Лаҵарамзаахыс аҳәаа иахысхьеит: 4,2 миллионҩык ауааԥсыреи миллионк атранспорттә хархәагақәеи (31 нызқь екскурсиатә автобусгьы абрахь иналаҵаны). Ашықәс иалагазар аҳәаа иахысит 7 миллионҩык ауааԥсыреи 1,6 миллион машьынеи.