Аԥсны

Аныцә рацәаны изааӡоз Аԥсны атәылауаа ҩыџьа аанкылоуп, ашьаус хацыркуп

Азинеилагаҩцәа 10 - 12 шықәса рҟынӡа ҭакрала рыхгара рықәырҵар ҟалоит.
Sputnik
АҞӘА, нанҳәа 15 - Sputnik. Аԥсны атәылауаа ҩыџьа рганахьала ашьаус хацыркуп анаркотикатә маҭәашьарқәа злоу аныцә рацәаны иахьырааӡоз азы, абри атәы аанацҳауеит Аԥсны Аҩнуҵҟатәи аусқәа рминистрра асаит.
Гәылрыԥшь араион инхо Руслан Габелиа дахьынхо Бабышьра ақыҭан иуҭраҿы ирбеит аныцә шиааӡоз. Иара ихаҭагьы данааныркылоз анаркотикатә маҭәашьар идкыланы дыҟан.
Иара убасгьы ихысуа абџьар закәаншьаҭада аахәареи амазаареи ихарарҵоит. Габелиа аҩнытә баандаҩра даҵаркуп.
Ремзик Габуниа Аҭара ақыҭан дахьынхо аҭыԥ аҿы аныцә рацәаны еиҭаҳаны ишимаз рбеит. Ашьаус хацыркуп. Габуниа даанкылоуп.