АҞӘА, нанҳәа 16 – Sputnik. Аԥсны амҩеихшарҭа аекономикатә проект ҿыцқәа рцәырҵра алнаршоит, абри атәы иҳәеит арадио Sputnik аинтервиу азҭаз Артур Атаев.
"Иазгәасҭарц сҭахуп, ари аҳәамҭа атәыла ахада иажәадгала акәны ишахәаԥштәу, еицтәароу аимпорт апрограммаҿ ахархәара зылшо амшынбаӷәазақәа ишырзааҭгыло. Иаадыруеит хәажәкыра 30 аҟынӡа Урыстәыла еицтәароу аимпорт апрограмма шыҟамыз, аха уажәы уи қәҿиарала аусура ишалагаз", - иҳәоит иара.
Аслан Бжьаниа иажәадгала аԥснытәи аполитикатәии аекономикатәии сегмент урыстәылатәи аекономикеи аполитикеи рзы актуалра шаҵоу аанырԥшуеит, иҳәоит аполитолог.
"Абиуџьет ахарҭәаара адагьы ари аинфраструктурагьы арҿиоит. Атранзит амацарала рацәак хра амам, аха хәарҭарыла еиҿкаау аинфраструктура аусурҭа ҭыԥқәа рыдагьы азанааҭ ҿыцқәа рҭаххара аанарԥшуеит",- иҳәеит иара.
Аекономикатә хабқәа, абаӷәазақәа, амҩатә инфраструктура рыҿиара хра ду рылоуп ҳәа ишьоит Атаев.
"Иуҳәар ауеит атранзит аҿиара арегионалтә економика ааидкыланы аҿиараз ихәарҭоуп ҳәа. Урыстәыла аекономикатә лшамҭақәа мрагыларахь рхьарҳәра иаанарԥшуеит аглобал макрорегионалтәи, аинфраструктуратәи, алогистикатәи проектқәа Кавказ, Абжьаратә Азиа, Китаи иаԥну аҵакырақәа шрыҵаркуа", – иҳәоит аполитолог.
Иара иазгәеиҭеит иахьа аԥшьгамҭақәа раԥҵареи раларҵәареи ишраамҭо.
"Аекономикеи аполитикеи рхырхарҭақәа рҟны Урыстәыла Аԥсны иадгылаҩуп. Еицымҩаԥгалатәуп аинвестициатә проектқәа аҳәынҭқарратә ҩаӡарала, ахаҭалатә аусеицура налаҵаны", - азгәеиҭоит Атаев.
Аекономикатә ԥкрақәа аҟәатәии очамчыратәии абаӷәазақәа, аҳаирбаӷәаза рыҿиара иадҳәало апроектқәа рцәырҵра иацхраауеит, иҳәеит аполитолог, иагьазгәеиҭеит ари амҩа аҿиара аиур шакәу.