АҞӘА, нанҳәа 31 - Sputnik, Бадраҟ Аҩӡба. Аминистрцәа реилазаара ирыдыркылеит Аԥсни Краснодари ркультуратә усбарҭақәа рыбжьара аилибакааразы Амеморандум апроект.
Адокумент рыдигалеит Акультура аминистр Даур Ақаҩба.
Иара иазгәеиҭеит Амеморандум ишахықәку акультуреи аҟазареи русхк аҟны жәларбжьаратәи асоциал-культуратә еимадарақәа рыҿиара азҵаарақәа рхырхарҭа хадақәа рышьақәыргылара.
Адокумент аҳәаақәа ирҭагӡаны Аԥсни Краснодари аус еицырулоит атеатрқәа, арҿиаратә коллективқәа ргастрольқәа еиҿыркаалоит, урыстәылатәии жәларбжьаратәии аицлабрақәа, аиармаркақәа, афестивальқәа ирылахәхоит, ацәыргақәҵақәа еиҿыркаалоит, аԥышәа еимырдалоит, аконсультациақәеи асеминарқәеи еицымҩаԥыргалоит.