АҞӘА, цәыббра 2 – Sputnik. 2023-2024 аҵара шықәсқәа рзы Урыстәылатәи аҵараиурҭақәа рҭаларазы ашәҟәқәа рыдкылара цәыббра акы аҟынтәи жьҭаара акахьы ииагоуп, абри атәы Sputnik иазеиҭарҳәеит Аԥсны иҟоу Россотрудничество Ахаҭарнакраҿы.
Арзаҳалқәа рыдыркылалоит апортал аҟны. https://russia-edu.minobrnauki.gov.ru/.
Ииасыз ашықәс азы Урыстәылатәи аҵараиурҭақәа рҭалараз Аԥсны иазоужьын 90 квота. Еиҳа иалыркааз иреиуоуп арҿиаратә занааҭқәа, урҭ алырхит 30-ҩык абитуриентцәа. Аҩбатәи аҭыԥ ннакылеит амедицина, ари азанааҭ алырхит 16-ҩык абитуриентцәа.
Урыстәыла абиуџьет аԥаразоужьрала аҵараҵаразы Аԥснытәи абитуриентцәа алхратә кампаниа иалахәхоит ареспублика иаҭоу аквотақәа инарықәыршәаны.
Аԥсны аҭахрақәа инарықәыршәаны 2022-2023 аҵара шықәсқәа рзы аквотақәа 52 рҟынтәи 90 рҟынӡа ирыцҵан.