АҞӘА, цәыббра 3 - Sputnik. Аԥсны Адәныҟатәи аусқәа рминистрра Никарагуа Адәныҟатәи аусқәа рминистррахь адныҳәалара нанашьҭит ҳреспублика азхарҵеижьҭеи 14 шықәса аҵра инамаданы. Абри атәы аанацҳауеит ААР Амедиацентр.
"Ҳгәы иахәаны иазгәаҳҭар ҳҭахуп ҳаназхашәҵаз, адипломатиатә еизыҟазаашьақәа анҳабжьаҳҵаз инаркны ҳаҩтәылак рыбжьара аполитикатә, агуманитартә уҳәа егьырҭ аусхкқәа рҟны аизҳара бзиа ыҟоуп", - ҳәа ануп адныҳәалараҿы.
Аминистрраҿы иазгәарҭеит ареспублика Никарагуеи ҳареи ҳаизыҟазаашьа наҟ-наҟгьы ишҳарҭбаало, ишҳарҿиало, уи азы апотенциал шыҟоу.
Никарагуа Аԥсны ахьыԥшымра азханаҵеит 2008 шықәса цәыббра 3 рзы. Никарагуа Аԥсны Ацҳаражәҳәарҭа аартын 2022 шықәсазы, адипмиссиа аиҳабыс дарҭеит Инар Ладариа.