ГӘДОУҬА, цәыббра 5 – Sputnik, Бадри Есиава. Гәдоуҭа араион ақыҭақәа рхадацәа "аҭыԥ маӡақәа" рҟны анаркотикқәа рышьҭаҵаҩцәа ирзашшит.
Дара ражәақәа рыла идырым ахаҿқәа зықәтәо амашьынақәа лассы-лассы ақыҭақәа рҿы инеиуа иалагеит, урҭ анаркотикқәа "амаӡаҵәахырҭақәа" рыԥшаара иашьҭоуп.
Аԥсны аҩнуҵҟатәи аусқәа рминистрра Гәдоуҭатәи аҟәша аиҳабы Зосма Гыцба иажәақәа рыла, ауааԥсыра рыгәҭынчымра рыцеиҩыршоит, амилициа аусзуҩцәа ирылшо шыҟарҵо ари аҭагылазаашьа аԥырҟәҟәааразы. Убри аан аҳәара ҟаиҵеит ақыҭауаа ианаамҭо адырра рырҭаларц, аоперативла арҭ ауаа раанкыларазы.
"Ҳара ҳхала ҳахәарҭаӡам ари апроблема аӡбра. Ацхыраара ҳҭахуп. Ҳажәҩа еибаҳҭароуп. Усеиԥш аныжәбалак иҳашәҳәала. Иаадыруеит асеиԥш аҭыԥ шрымоу Абӷархықә, Аацы, Жәандәрыԥшь", - иҳәеит Гыцба.
Иҟоу аинформациала аҵыхәтәантәи аамҭазы анаркотикқәа аҵәахырҭа-маӡақәа рҿы ишьҭазҵо Абжьаратә Азиа ауааԥсыреи Урыстәылатәи атуристцәеи роуп.
Аԥсны аҩнуҵҟатәи аусқәа рминистрра Гәдоуҭатәи аҟәша аиҳабы араион аҟны аҵыхәтәантәи ҩымчыбжь рыҩнуҵҟа ацәгьоуразы аҭагылазаашьа зеиԥшроу азы аҳасабырба ҟаиҵеит. Ари аамҭа иалагӡаны ҩ-ӷьычрак аҭыԥ рыман, руак аарԥшуп, анаркотикқәа закәаншьаҭада реиқәыршара афактқәа хԥеи, закәаншьаҭада абџьар аныҟәгара афакти азгәаҭан. Иара убас амҩатә машәырқәа жәаба ҟалеит, руак аԥсыҭбара ацын.