АҞӘА, цәыббра 7 - Sputnik. Акоронавирус рыԥсахит адунеи зегьы ашәарҭара иҭазыргыло егьырҭ аҭагылазаашьақәа, уи асанкциатә "шыӡ" ауп иҳәеит Урыстәыла ахада Владимир Путин.
"Акоронавирус инашьҭарххны амҽхак ҭбаа змоу ашәарҭарақәа цәырҵит адунеи азы. Зыӡбахә сымоу асанкциақәа роуп. Мраҭашәара егьырҭ атәылақәа иара иагәаԥхо ахымҩаԥгашьатә модельқәа ирықәныҟәаларц рыднаҵоит, иара амчра иаҵанагалоит", - иҳәеит Путин VII Мрагыларахаратә економиатә форум апленартә сессиаҟны.
Ахада иҳәеит Урыстәыла еснагь амилаҭтә интересқәа шахьчало, ихьыԥшым аполитика шымҩаԥнагало, абарҭ аҟазшьақәа рзы ауаа ҳаҭыр шрықәнаҵо.
"Урыстәыла – суверентә ҳәынҭқарроуп. Ҳара еснагь амилаҭтә интересқәа ҳахьчалоит, ихьыԥшым аполитика мҩаԥаагалоит, абарҭ аҟазшьақәа рзы ауаа ҳаҭыр рықәаҳҵалоит. Уи ус шакәу аанарԥшуеит акыршықәса имҩаԥааго аусеицураҿ ҳазҵагылоу аҭакԥхықәра", - иҳәеит Путин.
МЕФ мҩаԥысуеит цәыббра 5-8 рзы Мрагыларахаратәи афедералтә университет акампус аҿы, адгьылбжьаха Русское аҟны. РИА Новости информациатә партниорны афорум иазыҟоуп.