АҞӘА, цәыббра 10 - Sputnik. Акрал Карл III аофициалла Британиа ду амонархс дҟаҵоуп ҳәа ихьӡ рҳәеит асабшаҽны аҳра аимдаҩцәа рхеилак аҟны.
Карл III Британиа ду анапхгаҩыс иҟаларазы алаҳәара (прокламация-аред.) рнапы аҵарҩит аҭыԥ ду змоу ачынауаа аӡәырҩы, урҭ рхыԥхьаӡараҿы иҟоуп апринц Уилиам, акралԥҳәыс-консорт, аҳра аимдаҩцәа рхеилак аиҳабы-лорд Пенни Мордонт, Кентерберитәи архиепископ уҳәа егьырҭгьы.
Апринц Чарльз Британиа ду акралс дҟалеит аԥшьашаҽны иан акралԥҳәыс Елизавета II лыԥсра ашьҭахь. Аҳ итәарҭа иҭара ацеремониа аофициалла имҩаԥган асабшаҽны аҳра аимдаҩцәа рхеилак аҟны.