АҞӘА, цәыббра 28 – Sputnik, Бадракҟ Аҩӡба. Амҵәышәымпыл азы жәларбжьаратәи ачемпионат "Аиҩызара ахраҿа" 3х3 аатит Аҟәа Аиааира 29 шықәса ахыҵра иазкны.
Аԥсны амҵәышәымпыл Афедерациа аиҳабы Ераст Агәмаа Sputnik иазеиҭеиҳәеит ари аҩыза аицлабра ареспубликаҿы раԥхьаӡа акәны ишымҩаԥысуа, ҽааназы ишазԥхьагәаҭоу алахәылацәа ргеографиа арҭбаара.
"Аиҩызара ахраҿа" - мышктәи еицлаброуп, иааиааиуа акоманда амш анҵәамҭаз еилкаахоит. Аицлабра алахәхаразы ареспубликахь иааит Урыстәылантәи акомандақәа фбеи Белоруссиантәи командаки.
Ачемпионат аԥшәмацәа рыхьӡала ихәмаруеит акоманда "Апсны".
Иаабац амҵәышәымпыл аицлабра 3х3 излеиԥшым ҭаршәырҭа заҵәык ауп иамоу, ахәмарҩцәа командацыԥхьаӡа хҩык-хҩык ыҟоуп. Аиааира ргоит раԥхьа 21 очко зауа мамзаргьы жәа-минуҭк рыҩнуҵҟа еиҳаны аочкоқәа зауа.
Ахәмарра адагьы ауснагӡатә аҿы иазԥхьагәаҭоуп ашоу-программа, иқәгылоит Шәачатәи акавер-гәыԥ, аԥсуа милаҭтә ансамбль.