АҞӘА, цәыббра 30 – Sputnik, Бадри Есиава. Гагра иаатит Аиааира амши араион ахақәиҭтәра амши ирызку ашахматтә еицлабра ҳәа иҳәеит аицлабра аиҿкааҩцәа иреиуоу, аицлабрақәа рыӡбаҩ хада Альберт Карапетиан.
"Ари есышықәсатәи еицлаброуп. Сынтәа урыстәылатәи аспортсменцәагь аауеит ҳәа ҳаԥшын, аха аполитикатә ҭагылазаашьа уадаҩи апандемиеи ирыхҟьаны ҳаспортсменцәа рымацара роуп аицлабрақәа ирылахәхо", - ҳәа иҳәеит иара.
Аицлабрақәа мҩаԥысуеит цәыббра 28 - 29 рзы, адисциплина "блиц" ала. Шәҩык рҟынӡа Гагреи Гәдоуҭеи араионқәа рҟынтәи аспортсменцәа алахәхоит. Аиааира зго ироуеит амедалқәа, аҳаҭыршәҟәқәа, ахраҿақәа.
Карапетан иҳәеит Гагратәи ашахматтә секциақәа ҩ-хыбра ҭыԥк шроуз.
"Уаанӡа ашколқәа рҿы акәын аҽазыҟаҵарақәа ахьымҩаԥаагоз. Уи акыр иманшәаламызт. Уажәы ҳхатә хыҩнакырҭа ҳамоуп. Гагра ахадареи аспорт азы Аҳәынҭеилаки азалқәа еиҭашьақәдыргылеит. Даара ҳманшәалоуп". - иҳәеит иара.
Карапетиан иазгәеиҭеит ахыбра ҿыц ахь ианиис ашьҭахь ашколхәыҷқәа ашахматқәа акыр ишазҿлымҳахаз.