АҞӘА, жьҭаара 1 - Sputnik. Аԥснынтәи Донбасс хатәгаԥхарала еибашьуа Алиас Аҩӡба Урыстәыла атәылауаҩра ирмарианы иоуеит, абри азы аԥшьгамҭа дадгылеит Урыстәыла ахада Владимир Путин. Абри атәы аанацҳауеит Аԥсны Адәныҟатәи аусқәа рминистрра апресс-маҵзура.
Аҩӡба "Пятнашка" даланы иҷыдоу арратә операциа далахәын, нанҳәамзазы иара ахәра ӷәӷәа иоуит.
Уаанӡа Аҩӡба Урыстәыла атәылауаҩра ирмарианы иоуразы иарзаҳал неит Аԥсны Адәныҟатәи аусқәа рминистррахь.
Аусбарҭаҿы ишазгәарҭо ала, Аԥсны ахада Аслан Бжьаниа идгыларала иара Урыстәылаҟа ишьҭын адипломатиатә каналқәа рыла.