Ҟабарда-Балкариа атеракт аԥырҟәҟәаауп

Ҟабарда-Балкариа иҭархаз атеррористцәа ргәы иҭан Солдатскаиа астаницаҿы ацҳа ԥыржәарц.
Sputnik
АҞӘА, жьҭаара 2 - Sputnik. Урыстәыла Афедералтә шәарҭадаратә маҵзура Ашьаусԥшааратә еилаки, Аҩнуҵҟатәи аусқәа рминистрреи, Росгвардиеи рыцырхырааны Ҟабарда-Балкариатәи Ареспубликаҿы атранспорттә инфраструктура аобиектқәа рҟны зымҩаԥгара ргәы иҭаз атеракт аԥдырҟәҟәааит.
"Аоператив-шьаусԥшааратә усурақәа ирыбзоураны ҞБАр Прохладнентәи араион Солдатскаиа астаница иахьаҵанакуа В.И. Ленин ихьӡ зху адәыӷбацҳа азааигәара ирбеит ҩыџьа абџьар зкыз атеррористцәа адәыӷбамҩа аԥжәага шыҵарҵоз... Уи адагьы, даанкылоуп атеррористцәа ирымадаз даҽаӡәгьы", - ҳәа аанацҳауеит адырраҭара.
Иазгәаҭоуп атеррористцәа аҿагылара анаадырԥшуаз ишҭархаз, азинхьчаратә усзуҩцәа рыбжьара аӡәгьы ааха имоуит.
Ацәгьоуцәа ахьаангылоз аҭыԥ аҿы ирбеит аԥжәагақәа злаҟарҵоз аибыҭагақәеи амаругақәеи.