АҞӘА, жьҭаара 6 – Sputnik. Аԥсны ахада Аслан Бжьаниа аԥсуа жәлар ирыдеиныҳәалеит Гагра араион Қырҭтәыла Аҳәынҭсовет архәҭақәа рыҟнытә ахы иақәиҭыртәижьҭеи 30 шықәса аҵра амш. Абри атәы аанацҳауеит ахада ипресс-маҵзура.
Бжьаниа иазгәеиҭеит, хшыҩзышьҭра ду аҭаны, қәҿиарала имҩаԥгаз Гагратәи ажәыларатә операциа акырӡа зҵазкуа ак акәны ишыҟалаз ақырҭуа қәылаҩцәа риааира аагараҟны.
"Иахьа гәадурала иаҳгәалаҳаршәоит ҳаибашьцәа рфырхаҵареи ргәымшәареи ртәы, рыхьӡ кашәара ақәым ҳаԥсадгьыл ахақәиҭтәра зхы ақәызҵаз Аԥсны аҵеицәа хьӡырҳәагақәа", - ҳәа аҳәоит адныҳәалараҟны.
Жьҭаара6, 1992 шықәсазы Гагра араион акырҭуа мпыҵахалаҩцәа рҟынтәи ахы иақәиҭтәын.