АҞӘА, жьҭаара 7 - Sputnik. Аԥсны ахада Аслан Бжьаниа Урыстәыла ахада Владимир Путин иирамш идиныҳәалеит ҳәа аанацҳауеит ахада ипресс-маҵзура.
Владимир Путин инапхгарала Урыстәыла ажәлар қәҿиарала аглобалтә шәарҭарақәа рҭак ҟанаҵоит ҳәа азгәеиҭеит Аԥсны ахада.
Бжьаниа иазгәеиҭеит Путин ҳаамҭазтәи адунеитә ԥхьагылаҩцәа рыбжьара еиҳа анырра ҟазҵо напхгаҩны дшыҟоу, ижәлар адгылара ширҭо, иара ихьӡ ишадҳәалоу Урыстәыла жәларбжьаратәи аренаҿы еиҳа амчра змоу аҳәынҭқаррақәа иреиуаны ашьара.
"Аԥсны иқәынхо ажәлар ахәшьара ду арҭоит Аԥсни Урыстәылеи рыбжьара астратегиатәи аиҩызаратәи ҟазшьа змоу, адинамикатә ҟазшьала аҿиара змоу, алҵшәа аазырԥшуа, аиҩызареи аилибакаареи шьаҭаны иззыҟоу аҳәынҭқаррабжьаратә еизыҟазаашьақәа рырҿиара Шәара хаҭалатәи шәлагала", - ҳәа аҳәоит адныҳәалараҟны.
Аԥсны ахада агәыӷра ааирԥшит Урыстәылеи Аԥсни реизыҟазаашьа ԥхьаҟагьы еиҳа-еиҳа ишыӷәӷәахало азы.