АҞӘА, жьҭаара 10 - Sputnik. Атәыла Асанепидемстанциа аҳақьым хадас дҟаҵоуп Алла Белиаева, абри атәы аанацҳауеит Аԥсны Агәабзиарахьчара аминистрра апресс-маҵзура.
Алла Белиаева уаанӡа Аҟәа асанитартә ҳақьым хадас дыҟан.
Аминистр Едуард Быҭәба Белиаева аколлектив дыдирдырит.
"Ҳара зегь ҳаивагыланы Асанепидемстанциа аусура аҩаӡара шьҭаҳхроуп. Ибзианы еилышәкаауеит Агәабзиарахьчара аминистрра шәҿаԥхьа иқәнаргылаз ахыдҵақәа, ковид макьана инымҵәаӡацт, адунеи аҟны ҿыц ахьҽцәырнагаз ыҟоуп, убри аҟнытә агәҽанызаара шәымазароуп", - ҳәа иҳәеит иара.
Белиаева илырҭаз агәрагаразы ҭабуп ҳәа раҳәо аӷәыӷра аалырԥшит, лҿаԥхьа иқәдыргылаз адҵақәа зегьы рынагӡара лылшап ҳәа.
Ԥыхьатәи Аԥсны асанитартә ҳақьым хада Лиудмила Скорик х-миллион мааҭ аҳәынҭқарратә мазара лтәылтәит ҳәа агәҩара рымоуп. Аԥсны Апрокуратура хада ашьаус хацнаркит амаҵуратә напынҵақәа ҩынтә рхыҳәҳәареи аҳәынҭқарратә мазара ԥшьынтә ахатәтәреи аныхреи мҩаԥылгеит ҳәа.