АҞӘА, жьҭаара 22 - Sputnik, Сариа Кәарцхьиаԥҳа. Аԥснытәи амузыкантцәа злахәыз аконцерт мҩаԥысит Пиотр Чаиковски ихьӡ зху Москватәи аконсерваториа Рахманинов изал аҟны жьҭаара 21 аhы. Абри атәы ааицҳаит аконсерваториа апрофессор, аскрипкарҳәаҩы Виктор Абрамиан-Ешба.
Аконцерт аҟны иқәгылеит аԥышәа змоуи ҿыц иалаго артистцәеи, Москватәи аҳәынҭқарратә аконсерваториа астудентцәеи. Урҭ рхыԥхьаӡараҿы иҟан аԥсуа ҳәынҭқарратә филармониа ахкынагӡаҩцәа Нана Черкьезиа, Елена Ҳагба, жәларбжьаратәи апремиақәа алауреат аскрипкарҳәаҩы Мариа Терзиан-Ҳагба, адирижиор Барас Кәыџба. Аконцерт мҩаԥылгон зҽаԥсазтәыз артистка Есма Џьениаԥҳа.
Аконцерт анапхгаҩы Виктор Абрамиан-Ешба иажәақәа рыла, аусмҩаԥгатә шьахәны имҩаԥысит.
"Аконцерт шьахәла имҩаԥысит. Ахәаԥшцәа артистцәа бзианы ирыдыркылеит", - иҳәеит иара.
Ахәылԥазаҟны артистцәа инарыгӡеит аурысцәеи европатәи акомпозиторцәа рырҿиамҭақәа реиԥш аԥсуа ԥҵамҭақәагьы.
Аконцерт мҩаԥысит акультуратә программа "Аԥсны-Урыстәыла" аҳәаақәа иҭагӡаны. Адгылара арҭеит Урыстәыла иҟоу Аԥсны ацҳаражәҳәарҭеи Москватәи аԥсуа диаспореи.
Виктор Абрамиан-Ешба - москватәи аконсерваториа апрофессор, аскрипкарҳәаҩы. Аԥсуа револиуционер, аҳәынҭқарратә усзуҩ Ефрем Ешба имоҭа иоуп.