АҞӘА, жьҭаара 30 - Sputnik. Сретентәи аберҭыԥ ахори Аԥсны Аҳәынҭқарратә хортә капеллеи агәыҳалалратә концерт мҩаԥыргоит Мықәтәи ауахәамаҿы абҵара 6 асааҭ 13:00 рзы, абри атәы аанацҳауеит Акультура аминистрра апресс-маҵзура.
Сретентәи ауахәамаҿы анцәа имҵаныҳәарақәа раан адагьы Сретентәи ахор ашәа аҳәоит Мокватәи Кремль аҿы еиҳа игәырӷьаратәу апатриархтә нцәаимҵаныҳәарақәа раан, иалахәуп жәларбжьаратәи амузыкатә еицлабрақәеи Урыстәылатәи Аиашахаҵаратә Уахәама амиссионертә ныҟәарақәа.
Абҵара 6 рзы аконцерт иаҭаауа ирымоуп алшара ақьырсиантә культура иҷыдоу абаҟа аҭоурых иазку алекциа азыӡырыҩра. Мықәтәи ауахәамаҿы идыргылоит агәыҳалалратә хьыԥшьа. Еизыргаз аԥарақәа зегьы Мықәтәи ауахәама аиҭашьақәыргылара иаздырхоит.
Мықәтәи ауахәама ргылан Аԥсҳа Леон III ихаан, Аԥсуа аҳра еиҳа иҿианы ианыҟаз аамҭазы. Усҟан еиҿыркааит Мықәтәи аепископра. Ауахәама ахыбрақәа рахьтә еиҳа ихадоу аргылара рыԥшьеит Анцәа иан лыхьӡ ала.
Ари ауахәама акультура агәеисырҭас иҟан. Ара анапылаҩырақәа хырҩылаауан, ажәытә закәанеидкылақәа еиҭашьақәдыргылон.