АҞӘА, абҵара 5 - Sputnik, Бадраҟ Аҩӡба. Очамчыратәи ахәыҷтәы-қәыԥштә спорттә школ ашьапылампыл асыҩцәа актәи аҭыԥ ааныркылеит Ашьапылампыл жәларбжьаратәи аицлабра "БУТКАП" аҟны, 2010 шықәсазы ииз рыбжьара. Абри атәы аанацҳауеит Очамчыра араион ахадара Аҿари аспорти аҟәша.
Акоманда азыҟаҵаҩ хада Инал Ԥачулиа Sputnik иазеиҭеихәеит аицлабраҟны ашьапылампылтә команда "Ерцахә" фынтә ахәмаррақәа шымҩаԥыргаз.
Ростовтәи акоманда "Авангарди" "Ерцахәи" реиԥылара хыркәшан 4:0 ҳәа ҳшьапылампыла асыҩҵәа қәыԥшцәа риааирала, иара убас Каменск-Шахтинскнтәи акоманда "Строитель" ацхәмарра 4:2 ҳәа "Ерцахә" аиааирала ихыркәшахеит.
Анаҩс акомада 7:1 ҳәа иаиааит краснодартәи "Патриот" ацхәмарран. Новороссисктәи акоманда "К8-Метеор" ианацхәмаруаз "Ерцахә" 4:1 ҳәа иаиааит. Аха аԥсуа шьапылампыл асыҩцәа арекорд хәмарра мҩаԥыргеит новороссисктәи даҽа командак "К82-Метеор" ианацхәмаруаз. Ари аиԥылара хыркәшахеит 11:0 ҳәа "Ерцахәаа" риааирала.
Аицлабра афинал аҟны ҩаԥхьа еицыхәмаруан "Ерцахәи" ростовтәи акоманда "Авангарди", араҟагь 3:1 ҳәа "Ерцахә" аиааира агеит.