АҞӘА, абҵара 8 - Sputnik, Сариа Кәарацхьелиаԥҳа. Барнаултәи акоманда "Динамо-Алтаи" аиааира агеит аинвалидцәа-ампутантцәа рыбжьара ашьапылампыл маҷ азы X аиубилеитә еицлабра "Аиааира Ахраҿа" аҿы.
Афинал аҟны Махачкалатәи акомандеи иареи еицыхәмарит. "Динамо-Алтаи" 3:0 ҳәа аиааира агеит.
Ахԥатәи аҭыԥ аннакылеит Аԥсны акоманда. Уи афиналбжаҿы Махачкалатәи акоманда иацыхәмаруан.
Аԥсны Апаралимпиатә еилакы ахада Леон Ҵәыџьба иажәақәа рыла аицлабра маншәалан имҩаԥысит.
"Зегьы ибзианы ихәмаруан. Иҟан иԥшӡаны иҭаршәыз ампылқәа. Иалукаартә иҟан Даӷьесҭани Барнаули ркомандақәа. Аԥснытәи акомандагь цәгьамкәа ахы аанарԥшит иахәҭаз азыҟаҵара шамамызгьы", - ҳәа иҳәеит иара.
Аинвалидцәа-ампутантцәа рыбжьара ашьапылампыл маҷ азы X аиубилеитә еицлабра "Аиааира Ахраҿа" мҩаԥысит Аҟәа, абҵара 3-8 рзы.
Аицлабра иалахәфн хә-командак: "Кузбасс" (Кемерово), "Динамо - Алтаи" (Барнаул), "Монолит" (Казан), "Махачкала" (Махачкала), "Аԥсны" (Аԥсны).