АҞӘА, абҵара 13 – Sputnik, Бадри Есиава. Амуртәи абжьас нанагеит Аацы ақыҭан иҟоу алымқәа рпарк "Праид" ахь. Абри атәы Sputnik акорреспондент изеиҭеиҳәеит аобиект аицаԥҵаҩцәа руаӡәк Олег Кононов.
"Абжьас Пупс жәымз ахыҵуеит. Ҳара уи рымхәҳәаит Гагра акурорттә аамҭазы аус зуаз афотоҭыхыҩцәа. Аӡәырҩы аҳәара ҳарҭахьан уи ҳгарц азы. 70 килограмм раҟар акапан ыҟоуп. Иара ԥшӡоуп, иаланы иҟоуп, алеишәа цәгьаӡам, избанзар ауаа ирышьцылахьеит. Мышқәак иралыгӡаны ҳгәы иҭоуп гектарбжак иҟоу асаваннахь иоуҳашьҭыр, анаҩс иара азы мацара ҩ-гектарк иҟоу аҭыԥ ду хаҳкаауеит", - ҳәа азгәеиҭеит иара.
Кононов иажәақәа рыла, Пупс агәылацәа алымқәа раасҭа иласуп. Аҽыкәабара, ахәмарра бзиа иабоит. Аҭыԥ ҿыц ирласны иашьцылеит. Акрыфашьа бзиоуп, ҽнак ԥшь-кьылак акәац афоит.
"Ҳара иазҳаргылеит ауаргьала, ахәмаррақәа аҳҭеит, аӡы иахьҭалашагь еиҿаҳкааит. Иара алеишәа бзиоуп, ааигәара унанашьҭуеит, ахы ушьшьыр ауеит. Аха амч алоуп. Аҭрахьы уаннеиуа, иуахәмаруеит, иԥаны иугәыдԥалоит, умаҭәа ԥнажәар, уканажьыр алшоит. Ҳҭааҩцәа Пупс даара иргәаԥхоит", - иҳәеит Кононов.
Иара иажәақәа рыла, Пупс ҩымш рыла агәылацәа алымқәа илаԥшықәҵан ирымоуп, аанда иадеизаланы иахәаԥшуеит. Имеисырц азы еиҳа иҭшәоу аанда арҭеит.
Апарк аусзуҩцәа урыстәылатәи аҟазацәа ирыҿцәажәоит, дара Пупс ҭырҵаан, уи акапани, ахәы зеиԥшроуи, ахымҩаԥгашьеи рыла ишьақәдыргылеит агәабзиара шамоу. Иааиуа ашықәс азы аобиект анапхгаҩцәа Пупс "аҩыза" азааргоит Урыстәылантәи.