АҞӘА, абҵара 19 - Sputnik, Сариа Кәарцхьиаԥҳа. Аԥсуа боксиор Харитон Агрба дииааит WBA, IBF, IВО аверсиақәа рыла уаанӡатәи адунеи ачемпион Џьулиус Индонго RCC Boxing Promotions захьӡу аицлабраҟны асабша абҵара 19 рзы.
Агрба ахԥатәи араунд аҿы Индонго нокаут дишьҭит. Аиқәԥара иалагаанӡа абоксиор и-Telegram-канал аҿы иазгәеиҭеит ишылшара бзиоу “иуеиӷьу ииааира, уи еиҳагьы амч унаҭоит ачемпионцәа рмаҟақәа раиураҟны”.
Абокс ахәылԥаз мҩаԥысит Екатеринбург асабша абҵара 19 рзы Урыстәылатәи абҩатә еилахәыра иатәу Аиқәԥарақәа ракадемиаҿы.
Харитон Агрба – Аԥснытәи аспортсмен, Урыстәылатәи Афедерациа абираҟ даҵагыланы дықәԥоит, жәларбжьаратәи акласс аспорт азҟаза. Атитулқәа WBA Fedecaribe, WBA Continetal, IBF European имоуп, 2019 шықәса раахыс апрофессионалтә ринг аҿы дықәгылоит: зныкгьы даҵамхацт, ф-еиԥыларак рҟны нокаутла даиааихьеит.