АҞӘА, абҵара 22 – Sputnik. Аҟәатәи ҳаирбаӷәаза хәҭа-хәҭалатәи аиҭашьақәыргыларатә усурақәеи аргыларақәа рхатәреи азҵаарақәа рҿы, аԥсуа гани аинвестори рыбжьара аҳәоуеиқәымшәарақәа цәырҵит. Абри атәы аҳәынҭқарра ахада еизеиҭалҳәеит аԥыза-министр, аекономика аминистр Кристина Озган.
Аслан Бжьаниа инаҵшьны иазгәеиҭеит, ашьҭԥраара-артәаратә цәаҳәеи аҳаирбаӷәазатә инфраструктуреи хымԥада Аԥсны Аҳәынҭқарра ишатәу. Аԥсуа ган ахатәра ишақәиҭу азҵаараҟны хьаҳәа-ԥаҳәрада агәаанагара шамоу.
Владислав Арӡынба ихьӡ зху Аҟәатәи аҳаирбаӷәаза ргылан 1960-тәи ашықәсқәа рзы. 1990-тәи ашықәсқәа рҟынӡа арантәи аҳаирпланқәа ԥыруан СССР ақалақьқәа жәпакы рахь. Аԥхынразы уахыки-ҽнаки рыла имҩаныргон хә-нызқьҩык рҟынӡа апассаџьырцәа.
Аҳаирбаӷәаза аусура аиҭаларгараз ауснагӡатәқәа нап аркын 2018 шықәсазы, Урыстәылатәи аинвестор далахәны апроект-харџьнҵа аиқәыршәаразы. Аҳаирбаӷәаза анаадыртлак уахыки-ҽнаки рыла х-нызқьҩык инаркны хә-нызқьҩык рҟынӡа апассаџьырцәа рымҩангара алшоит. Иара убас аидарамҩангаразы ахархәара аиур ҟалоит.