АҞӘА, ԥхынҷкәын 1 - Sputnik. Аԥсны АҶА-и Урыстәыла Амашәырцәгьақәа рмедицина ацентри аусеицуразы аиқәшаҳаҭра рыбжьарҵоит. Абри атәы Аԥсны ААР Амедиацентр иазеиҭиҳәеит Аԥсны АҶА аминистр Лев Кәыҵниа.
Аԥсны АҶА ахада Москва дырԥылеит амашәырцәгьақәа рмедицина Афедералтә центр ахаҭарнакцәа. Аганқәа иҳәаақәырҵеит ԥхьаҟатәи русеицушьа.
"Москва акрызҵазкуаз аиԥылара ҳаман Амашәырцәгьақәа рмедицина афедералтә центр ахаҭарнакцәеи ҳареи. Дара иаҳзеиҭарҳәеит русура атәы, иаҳдырбеит русушьа. Акыр аинтерес аҵан, избанзар АҶА аҿы акыр шықәса аус ауеит ари амедицинатә усбарҭа", - ҳәа иҳәеит Кәыҵниа.
Ҳаинырра иахырхарҭа хадахоит аҵараиуратә уснагӡатәқәа, ааха зауз рымҩангараз аусқәа рҽырзыҟаҵара.
АҶА амедицинатә усбарҭа аиҳабы Андзор Гоов Амедиацентр аинтервиу аҭо иҳәеит аусеицура наҟ-ааҟгьы ишырзыфеидоу.
"Ҳусбарҭақәа ииашаны реинырра алҵшәа бзиақәа ҳнаҭоит", - иҳәеит иара.
Аамҭақәак рыла амашәырцәгьақәа рмедицина амаҵзура аделегациа Аԥсныҟа иаараны иҟоуп аинырраз аиқәшаҳаҭра ахәҭақәа аус рыдуларазы.