АҞӘА, ԥхынҷкәын 2 - Sputnik. Аԥсни Шьамтәылеи ахәаахәҭратә хаҭарнакрақәа раартра атәылақәа рыҩбагь рзы алшара бзиақәа аанартуеит ҳәа иҳәеит арадио Sputnik аефир аҿы Шьамтәыла иҟоу Аԥсны ацҳаражәҳәаҩ Баграт Хәытаба.
“Уажәы Аԥсны ахәаахәҭратә хаҭарнакра Шьамтәылатәи Арабтә Республикаҟны аартра азҵаара аус адулара цоит. Ҳәарада ари ахәаахәҭреи аекономикеи рхырхарҭақәа рҿы аизыҟазаашьақәа рырҿиара иацхраауеит. Шьамтәыла арратә ҭагылазаашьа шымариамгьы алшарақәа ҟалоит аинтерес змоу ахырхарҭақәа рҿы, ирҿаҳҵааша рацәоуп, ҳтәылаз афеидарақәа ҟалоит", - ҳәа иҳәеит Хәытаба.
Иара иажәақәа рыла Шьамтәылатәи Арабтә Республика аекспорт азы атауар рацәа ҭнажьуеит. Урҭ рыхәҭак урыстәылатәи аџьармыкьахь инеиуеит.
Аԥсны "х-ганктәи аусеицура аҳәаақәа ирҭагӡаны ахәаахәҭра-економикатә еизыҟазаашьақәа рынагӡареи рырҿиареи рзы хабк иаҳасабхар ҟалоит".
Хәытаба иажәақәа рыла Аԥсны аҳауатә ҭагылазаашьа маншәала ыҟоуп. Шьамтәылатәи анаплакыҩцәа азҿлымҳауп атуризм, ақьафурҭатә бизнес аусхк аҿиара, иара убас мрагыларатәи ахаақәа рҭыжьра.