АҞӘА, ԥхынҷкәын 7 – Sputnik, Сариа Кәарацхьелиаԥҳа. Адунеизегьтәи аԥсуа-абаза конгресс VIII аизара ду аатит Аҟәа ԥхынҷкәын 7 рзы.
Аизара ду аартраан дықәгылеит Аԥсны ахада Аслан Бжьаниа. Иара игәалаиршәеит актәи аизара ду анымҩаԥысуаз иҟаз аамҭа уадаҩқәа.
"1992 шықәсазы, Аԥсны жәлар Рџьынџьтәылатә еибашьра анцоз, Лыхны ақыҭан имҩаԥысит аԥсуа-абаза жәларқәа Жәларбжьаратәи рассоциациа аизара ду. МАААН иаус хаданы иҟан Аԥсадгьыл ахьчараз игылаз ажәлар реидкылара. Аконгресс иалшеит аԥсуа жәлар рзы илахьынҵанагӡагаз азҵаарақәа рыӡбара. Иалшеит аԥсуаа, абазақәа, егьырҭ аиашьаратә милаҭқәа рхаҭарнакцәа реидкылара. Ихадароу еидкылаган иҟан Аԥсуа ҳәынҭқарра ахьчара аидеиа", - ҳәа иҳәеит Аслан Бжьаниа.
Иара иажәақәа рыла аибашьра ашьҭахь аконгресс аусура еиҳагьы аҽарҭбааит, аԥсуеи абазеи жәларқәа еидызкыло еиҿкаарахеит.
"Иҳәатәуп аконгресс асеиԥш аҟалара алзыршаз иара ахыҵхырҭаҿ игылаз ауаа шракәу", - ҳәа азгәеиҭеит Бжьаниа.
АААК ахантәаҩы Мусса Егзакь иҳәеит VIII аизара ду аконгресс аиубилеитә шықәсаз ишымҩаԥысуа.
"Аԥсуа-абаза конгресс 30 шықәса ахыҵит. 30 шықәса қәра дуум , аха иауҭоит алшара имҩаԥгоу аусурақәа рызхәыцразы, ԥхьаҟатәи апланқәа рҽазырхиаразы. Аханатә ҳара ҭаацәаракны ажәлар реидкылара иазырхоу апроектқәа мҩаԥаагоит", - ҳәа иҳәеит Егзекь.
Иара иҳәеит иҟоу агеополитикатә ҭагылазаашьа уадаҩ иаҿмырԥшкәа аиҿкаара аусурақәа шымҩаԥнаго.
Раԥхьатәи Адунеизегьтәи аԥсуа-абазатә конгресс аизара ду мҩаԥысит 1992 шықәсазы Лыхны ақыҭан. Аконгресс ахь иааԥхьаз 140-ҩык аделегатцәа рҟынтәи аартра иалахәын 125-ҩык, Аԥсны еиԥш Ҭырқәтәыла, Германиа, Франциа, Голландиа, Ҟабарда, Адыгеиа, Шапԥсыӷтәыла, Абазашҭа рҟынтә.
Аизара ду аартраан ақырҭуа фашизм дақәыӡбо дықәгылеит Владислав Арӡынба.