АҞӘА, ԥхынҷкәын 11 – Sputnik, Бадри Есиава. Аҟәа ихыркәшахеит ашьапылампыл азы Жәларбжьаратәи ахәыҷтәы еицлабра "APSNY OPEN 2022" ԥхынҷкәын 11 рзы ҳәа Sputnik акорреспондент изеиҭеиҳәеит Аԥсны ашьапылампыл Афедерациа ахаҭарнак Шабаҭ Логәуа.
Иара иазгәеиҭеит, аицлабра ишалахәыз 23 команда, урҭ рахьынтәи 12 команда Урыстәылантәи 11- Аԥснынтәи. Ақәратә категориақәа ҩбаны еихшан 2010 - 2011 шықәсқәа рзы ииз рыбжьара.
2011 шықәсазы ииз рыла ишьақәгылаз акомандақәа рыбжьара актәи аҭыԥ ааныркылеит Растовтәи аобласт акоманда "Чайка", аҩбатәи "Академия Рамзана" - Грозныи, ахԥатәи акоманда "Зенит".
2010 шықәсазы ииз рыбжьара ахьы иаԥсахеит "Алания – 1", араӡны ргеит "Алания – 2", аџьаз – "Динамо" Аҟәа.
"Ахәмаррақәа мҩаԥысит аныҳәатә гәалаҟазаара ацны. Аԥсны ашьапылампыл Афедерациа абзоурала аицлабрақәа мҩаԥган ҩаӡара ҳаракыла. Ахәаԥшцәагьы рацәаҩын", - ҳәа иҳәеит Логәуа.
Иазгәеиҭеит, акомандақәа аҳамҭақәа ранашьара рхы шаладырхәыз Аԥсны Жәлар Реизара аиҳабы Лаша Ашәба зхадараҿы дыҟаз гәыԥҩык адепутатцәа.
Логәуа иҳәеит Аԥсны ашьапылампыл Афедерациа агәы ишҭоу ари аицлабра есышықәса амҩаԥгара.