АҞӘА, ԥхынҷкәын 13 - Sputnik, Бадри Есиава. Ашықәс ҿыцазтәи аԥсаӡ Риҵатәи амилаҭтә реликттә парк анаԥшы-ааԥшырҭатә ҭыԥ аҿы идыргылеит. Абри атәы Sputnik акорреспондент изеиҭеиҳәеит апарк аҿы еиҿкаау атуризми аекскурсиақәеи рыҟәша аиҳабы Етлан Багаҭелиа.
"Аԥсаӡ аура аа-метрак иҟоуп. Ҵыԥхгьы ара игылан аԥсаӡ, аха усҟан даҽа ԥшшәхәқәак рыла еибыҭан. Уажәы аҟаԥшьи ахьԥшшәи алҳхит. Аҟаԥшь уажәтәи аамҭазы иактуалуп", - иҳәеит иара.
Багаҭелиа иазгәеиҭеит аԥсаӡ ҵыԥх идыргылац шакәугьы аҽшаԥсахыз, ҵыԥх иара зынӡа даҽакала ишеибыҭаз, араӡни аиаҵәеи рыла ишеиҿкааз.
Аԥсаӡ амацара акәӡам аԥсшьаҩцәа аныҳәа шааигәахо ргәалазыршәо. Анаԥшы-ааԥшырҭатә ҭыԥаҿы идыргыло ахыԥхьаӡара 2023 ырԥшӡахоит еилацәҟәуа алашаратә рхиагақәа рыла.
Иара убас, Ажәҩанԥшшәылатәи аӡиа ҳәа иахьашьҭоугьы ԥшь-метрак иҟоу аԥсаӡ дырхиоит, акәшамыкәша аҭыԥқәа илашо ампышҭақәеи алакә фырхацәа рсахьақәеи рҭыԥ ылырхуеит.
Етлан Багаҭелиа иҳәеит атәыла асасцәеи аҭыԥантәи ауааԥсыреи уаанӡеиԥш аԥсаӡ аҟынтәи ахәмаргақәа рыкныхра иалагарым ҳәа дышгәыӷуа.