АҞӘА, ԥхынҷкәын 15 – Sputnik. Аԥсны Жәлар Реизара адепутатцәа Асҭамыр Гьерхьелиеи Ахра Ԥачлиеи алахәын III Жәларбжьаратәи аконференциа "ИАР атәылақәа рпарламентбжьаратә усеицураҿ афракциақәеи аполитикатә партиақәеи аблокқәеи реинырра ароль".
Аԥсны Урыстәыла имҩаԥнаго арратә операциа иадгылоит иҳәеит атәылахьчареи амилаҭтә шәарҭадареи рзы аилак алахәыла Асҭамыр Гьерхьелиа.
"Аԥснаа хатәгәаԥхарала урыстәылатәи асолдаҭцәа ирывагыланы еибашьуеит, ршьа карҭәоит", - иҳәеит иара аконференциаҟны иқәгылараан.
Иколлега Ахра Пачлиа инаҵшьны иазгәеиҭеит Аԥсни Урыстәылеи реизыҟазаашьақәа аҳаҭыреиқәҵареи агәреибагареи рыпринципқәа шьаҭас ишрымоу, жәларбжьаратәи азин ишықәныҟәо.