АҞӘА, ԥхынҷкәын 23 - Sputnik. Шә-тоннак ацхырааратә еидара ДЖәР, ЛЖәР, Херсонтәии Запорожтәии аобластқәеи рахь инагоуп Аԥсны ахада иҟаиҵаз анапынҵала. Аԥсны АҶА аиҳабы Лев Кәыҵниа аԥыза-министр изеиҭеиҳәеит агуманитартә еидара агара аихшьаалақәа ртәы.
Ацхырааратә еидара ахәҭак ахәыҷбаҳчақәеи зылшарақәа ԥкыу ахәыҷқәа рзы ашколқәеи ирзыршеит.
Урыстәыла арегион ҿыцқәа амандарина рзышьҭразы, Аԥсны араионқәа зегь рыҟны аизгараз аҭыԥқәа аартын ԥхынҷкәын 5 инаркны. Зынӡа еизган шә-тоннак инареиҳаны амандарина.
Аидара урыстәылаҟа агараҿы аԥсуа еиқәырхаҩцәа ацхыраара рырҭеит "Агвардиа ҿа" аволантиорцәа. Урҭ Урыстәыла арегион ҿыцқәа Донецк, Луганск, Херсонтәии Запорожтәии аобластқәа рыҟны ацентрқәа аадыртит.