АҞӘА, ԥхынҷкәын 27 – Sputnik, Бадраҟ Аҩӡба. Аԥсны Аминистрцәа реилазаара ишьақәнаргылеит аусбарҭатә хықәкытә программа Аекономика аминистрра апрограмма-аппараттә комплекс аиуразы.
Аекономика аминистр Кристина Озган иазгәалҭеит апрограмма аԥҵара шхымԥадатәиу аекономика асубиектқәа рынхамҩатә усура инагӡаны аҭҵааразы.
Афинансқәа рминистр Владимир Делба иҳәеит аусбарҭа ари аԥшьгамҭа ишадгыло. Апрограмматә уснагӡатәқәа рынагӡара х-хәҭакны имҩаԥгахоит:
амыругақәа раахәареи рықәыргылареи;
апрограмма-аппараттә комплекс азы апрограмма аԥҵара;
акомплекс ахархәарахь анашьҭреи аҟазауаа дырҵареи.
Апрограмма хықәкыс иамоуп астатистикатә рбагақәа реиӷьтәреи иара убасгьы Аԥсны асоциал-економикатә ҿиара аекономикатә индикаторқәа риоуреи еиҳа хра рыманы рыҟазаара иазырхоу аҳәынҭнапхгараҭара аусбарҭақәа реинырра амеханизмқәа реиӷьтәра.